Арадай Хуралай Түрүүлэгэ Цырен-Даши Доржиев Ородой Холбоото Уласай Федеральна Суглаанай Гүрэнэй Дүүмын депутадаар һунгагдаһан ушараар Алдар Дамдиновые амаршалаа. Буряад уласай улад зоной һуралсай сайдтаа этигэл ехэтэй байһые тэмдэглээд, шэнэ ажалдаа амалта туйлахыень хүсэһэн байна.
«Буряад Уласай арад түмэнэй эрхэ хүсэлнүүдые засагай дээдын зургаанда аша үрэтэйгөөр аршалжа байха бэзэт гэжэ этигэнэб» гээд улас түрын парламентын түрүүлэгшын амаршалгын телеграмма дотор хэлэгдэнэ.
Восток-Телеинформ анхан мэдээсэһээр, Алдар Дамдинов нэгэ мандадтай 9 дүгээр тойрогто олонхи зоной дуугаар илажа, ородой парламентын доодо палатада Буряад Уласые түлөөлхэ болобо. Гүрэнэй Дүүмын депутадай тушаалда тэрэ нэн түрүүн һуралсалай бэрхэтэй асуудалнуудые табиха хүсэлтэй.
- Эндэтнай үшөө гүрэн түрын зиндаада хүдэлхэ хэрэгтэй. Энэмнай һургуулида хабаатай онол нүхэсэлнүүд, тэрэшэлэн һуралсалай гурим нарижуулха хуули ёһонууд болоно. Хэр тиигэбэшье, һуралсалһаа гадууршье асуудалнуудта анхарал хандуулагдаха, тэрэ тоодо эдэй түрын, ариг сэбэрэй гэхэ мэтын зоной ажабайдал һайжаруулха талаар бэрхэшээлнүүд, - гээд экс-сайд мэдүүлбэ. Тэрэнэй тэмдэглэһээр, һунгалтын урдахи урилдаанай үедэ аяар 200 гаран уулзалга үнгэргэгдөө, мянга үлүүтэй захил абтаа. Тэдэнэртэ харюунууд заабол үгтэхэ.
