Арадай Хуралай депутат Баир Цыренов округайнгоо зүүн бэеын ажаһуугшадтай уулзаба. Буряад Уласай Арадай Хуралай хэблэлэй албанай мэдээсэһээр, тэндэ ниислэл хото хүгжөөхэ тухай Улас түрын хараа түсэл тухай хөөрэлдөөн болоо. «Зүүн бэеын шухала үүргые ойлгуулжа шадаабди. Энэмнай юуншье һаа Улаан-Үдын үүдэн гэмээр микрорайон. Энэ талада «Байгал» аэропорт, гүрэнэй мэдэлэй харгыда ородог замууд эндэ», - гэжэ депутат тэмдэглээ.
Цыреновай хэлэһээр, Буряад Уласай Толгойлогшо Вячеслав Наговицын Зүүн бэе һэргээхэ тухай түсэб зохёохыень даабари үгэнхэй. Тиимэһээ зарим тэды шиидхэбэринүүд абтаа. Жэшээнь, ажаһуугшадай байдал хүнгэдхэхын тула Барилгашадай гудамжаар 1 дүгээр поликлиникын таһаг һаядаа нээгдэхэ. Энэ хэрэгтэ Улас түрын һанһаа байшан худалдажа абаха мүнгэн һомологдоо. Тэрэшэлэн, удангүй холуур байгааша Тулунжа, Исток, Солдатский, Аэропорт, Степной тосхонгуудаар бүхы үбшэнүүдээр мэргэжэһэн врачнуудай табан гуламта офисууд нээгдэхэ.
Энээнһээ гадна, 8-дахи, 54-дэхи һургуулинуудта тамирай танхимуудые хабсарха тухай ойлгуулагдаа. Мүн Сокол тосхондо хүүгэдэй сэсэрлиг бариха газар тодорхойлогдоо.
