Игорь Марковецэй ударидалга доро Ниигэмэй халамжын талаар Буряад Уласай Арадай Хуралай хорооной һунгамалнууд эхин шатын эмнэлгэ-сувилалгын туһаламжын шанар дээшэлүүлхэ болон зондо хүртөөмжэтэй болгохын талаар эрхэтэнэй элүүр мэндые хамгаалха асуудалнуудаар “Зэдын аймаг” гэһэн муниципальна байгууламжын ажалай нүүдэл суглаа үнгэргөө.
Доодо Үшөөтэ һууринда 2022 оной апрель соо шэнэ ФАП нээгдээ һэн. Энэ пункт буряадай түрүүшын эртэмтэн Доржо Банзаровай зуун жэлэй ойдо тэрэнэй түрэһэн нютагта баригдаһан байгаа. 80 дүрбэлжэн метр талмайтай 6 сая түхэригтэ хүрэһэн байшан халаандаа 15 ерэгшэдые хүлеэн абажа байхаар зорюулагданхай. Фельдшерско-акушерско пунктда «Земскэ эмшэн» гэһэн хүтэлбэреэр зууршалагдаһан мэргэжэлтэн ажаллана. Петропавловкада хүүгэдэй эмнэлгэдэ ехэ мүнгэнэй заһабарилга хэгдэнэ –тоног түхеэрэмжэ шэнэлэгдээ, тиигэжэ Петропавловкын ажаһуугшадта эмнэлгын туһаламжа хурдан болон шанартай болохо. Доодо Торидо модульно шэнэ байшан болбол 1947 ондо баригдаһан хуушаниие һэлгээ. 165 дүрбэлжэн метр талмайтай эмхи зургаанда участково терапевт хүлеэн абана, үдэрэй стационарай 10 орон бии, түргэн туһаламжын отделени хүдэлнэ. Тус амбулатори Доодо Тори болон Шара Тэхэ һуурин газарнуудые үйлшэлнэ, харин терапевт 11 дүтын һууринуудта түсэблэгдэһэн сагтаа ошожо үйлшэлнэ.
