Арадай Хуралай һунгамалнууд түрүүшын экопромпаркошожо ажалтайнь танилсаа –хог хаядаһа илгаха станциин түрүүн байжа байһан газарта тэрэ байрладаг юм. Энэ жэл уласай бюджедһөө тэрэниие һэльбэн шэнэлэлгэдэ 8,5 сая түхэриг һомологдоһон байгаа. Газарайн талмай 5 мянган дүрбэлжэн метр тухай болоно. Тэндэ 5-6 резидентнүүдые оруулхаар хараалагдана. Мүнөө хүрэнгэ оруулалтын хэмжээниинь 30-40 сая түхэригтэ хүрэнэ, харин резидент компанинуудай жэл бүриин эрьесэ 100 сая түхэригэй хэмжээндэ хүрэхөөр түсэблэгдэнэ.
Эдэй засагай бодолгын, байгаалиин баялиг ашаглалгын болон экологиин Буряад Уласай Арадай Хуралай хорооной түрүүлэгшэ Анатолий Кушнарёвой хэлэһэнэй ёһоор, Сэлэнгэ мүрэнэй зүүн бэедэ вертолетно заводой байһан газарта промышленно паркын байгуулагдажа байхада – байдал бүришье муу байгаа юм һэн. Харин мүнөө промпаркын резидентнүүд уласай бюджедтэ яһала һайн налогуудые түлэжэ, үйлэдбэриин талаар амжалтатай харуулалтануудтай байна.
- Энээхэн хүдэлжэ байһан промпарк ДФО болон СФО-до эрхимүүдэй нэгэн болохо гэжэ үнэншэхэ хүн үсөөн байгаа. Гурбан жэлэй үмэнэ хог хаядаһа болбосоруулха тухай асуудал табижа эхилээ һэмди, тиигэжэ энэ жэл 10 сая түхэригэй һомололго “сожижо гаргаабди”. Тэрэ мүнгэнэй 8,5 сая түхэригынь һэльбэн шэнэлхэ хэрэгтэ гаргашалагдаха. Нүгөө жэл баһал тодорхой мүнгэ хараалхабди, юундэб гэхэдэ, энэ ажалые зогсоожо болохогүй бшуу. Нэгэ сагта хүдэлжэ байһан промышленно паркда шэнги эндэ журамтай болохо, - гэжэ Анатолий Кушнарёв тэмдэглээ.
