Уласта Буряадай Толгойлогшо Алексей Цыденовэй дэмжэлгээр буряад хэлэ сахин хүгжөөхэ талаар гүрэнэй программа бэелүүлэгдэдэг. Харин нёдондонһоо буряад хэлэ хүгжөөлгын талаар эрхим дүй дүршэл элирүүлхэ ба урмашуулха үүргэтэй Буряадай Толгойлогшын нэрэтэ жэл бүриин шан тогтоогдоо юм.
Гадна хүүгэдэй сэсэрлигһээ эхилээд, дээдэ һургуули болотор бүхыдөө болбосоролой һалбарида буряад хэлэ сахин хүгжөөлгын олон асуудалнууд шиидхэгдэнэ. Тэрэшэлэн хоёр шэглэлтэй (буряад хэлэн ба уран зохёол болон ород хэлэн) багшанарые зорилготоор бэлдэлгэдэ уласай бюджедһээ мүнгэн үгтэдэг. Жэл бүхэндэ 10-20 хүн энэ дэмжэлгын ашаар һурадаг юм. Мүнөө хэлсээтэ үндэһөөр 80 оюутадые абанхай. 2020 онһоо тэдэндэ стипенди түлэгдэдэг гэжэ Толгойлогшын хэблэлэй албан мэдээсээ.
2022 ондо түрүүшын арбан оюутад Доржо Банзаровай нэрэмжэтэ Буряадай гүрэнэй ехэ һургуули дүүргээд, Сэлэнгын, Баргажанай, Мухар-Шэбэрэй, Түнхэнэй, Яруунын, Захааминай аймагуудай болон Улаан-Үдэ хотын һургуулинуудта хүдэлжэ байна. Гадна энэ жэл буряад хэлэндэ хабаатай бусад мэргэжэлтэдые бэлдэлгэдэ мүнгэн үгтөө юм. Тиин 15 оюутад «Хэлэ бэшэг» гэһэн шэглэлээр болон 5 оюутад «Уран зохёол» гэһэн шэглэлээр һуража эхилээ.
Буряад хэлэнэй багшын нэрэ хүндэ дээшэлүүлхэ зорилгоор һургуулинуудай ба хүүгэдэй сэсэрлигүүдэй буряад хэлэнэй багшанарай ба хүмүүжүүлэгшэдэй дунда «Эрхим багша», «Эрхим хүмүүжүүлэгшэ», «Буряад хэлэн ба уран зохёолой эрхим танхим» гэһэн мүрысөөнүүд үнгэргэгдэдэг. Һурагшадташье мүрысөөнүүд зорюулагдадаг: 9-дэхи ангиин һурагшадай «Оюун бэлиг»гэһэн уласхоорондын мүрысөөн, буряад хэлэнэй һуралсалай сахим номоор мүрысөөн, «Нюуса тобшо», «Гуламта», «Уран гуурһан», «Мүнгэн гуурһан» болон бусад.
Уласай хүүгэдэй сэсэрлигүүдтэ 143 бүлэгтэ буряад хэлэнэй оршондо оруулха ажал ябуулдаг. Тус бүлэгүүдтэ ажалладаг хүмүүжүүлэгшэдтэ сентябриин 1-һээ салиндань нэмэлтэ мүнгэн түлэгдэдэг. Буряад хэлэнэй программануудые бэелүүлдэг үмсын сэсэрлигүүдшье дэмжэлтэдэ хүртэдэг.
Шоу-наадануудай ашаар буряад хэлэ дэлгэрүүлгын ба хүгжөөлгын мүнөө үеын түхэлнүүдэй нэгэн гэхэдэ, «Үльгэрэй орон» гэһэн оюун ухаанай-зугаасуулгын наадан болоно. 2022 ондо 3 мянга гаран һурагшад тэрээндэ хабаадаа. Гадна улас дотор хоёрдохи жэлээ түхэреэн хоногой туршада ганса буряадаар дамжуулдаг «Буряад ТВ» гэһэн телесубаг хүдэлнэ. Тиихэдэ «Буряад FM» радио 6 жэлэй үргэлжэдэ түхэреэн хоногой туршада буряадаар дамжуулжа байна. Уласай аймагуудта буряад хэлэ ба соёл хүгжөөлгэдэ ажалаа зорюулһан ТОС-уудта жэлһээ жэлдэ хүнүүд олошоржол байна. Арадай театнууд байгуулагдана, хүгжэнэ.
