Буряад Уласай Засагай газарай болон «ГЕОинформ» гэһэн ООО-гой хэлсээ баталһанай хүреэндэ уласта ухаалиг бүтээн байгуулалтатай олоной бэеэ һорихо спортын модульно табан талмайнууд баригдахаар болоо.
Улаан-Үдэ хотодо Орешковын сэсэглиг соо болон «Юбилейный» гэһэн соёлой ба амаралтын сэсэглиг соо, мүн баһа Гусиноозерскдо, Түнхэнэй аймагай Аршаанда болон Ивалгын аймагай Гүрэльбэ һууринда шэнэ талмайнууд байгуулагдаха. Спортын талмайнуудта баскетбол, футбол, воркаут, панна футбол, хоккей наадаха бүһэлүүрнүүд байха. Тиихэдэ хоолны газар, секцинүүдые эмхидхэхын тула таһагууд болон ажахын таһаг байха юм. Түсэл бэелүүлгэ 370 сая түхэригтэ, түсэл бэелүүлхэ болзор – 2022-2028 онууд болоно. Буряад Уласай Толгойлогшо Алексей Цыденовэй хэлэһэн үгэнүүдэй ёһоор, эдэ талмайнууд шэнэ формадтай, тэдэниие барилгада хубиин-гүрэнэй хоршоо нүхэрлэлэй заршам хэрэглэгдэхэ.
- Гүрэнэйшье, хуби хүнэйшье мүнгэн спортын бүтээн байгуулалтада оруулагдаха, гэхэдээ гол ехэнхидээ эдэбхитэй спортын түрэлнүүдтэ зорюулагдаха. Эдэ талмайнууд түлбэригүй болон олондо хүртэмжэтэй байха юм. Ямар нэгэ нэмэлтэ түрэлнүүд аралжаанай байжа болохо, зүгөөр эдэ бүгэдэ эрилтэтэй байха, эндэ хүнүүд спортоор бэеэ һорихо. Манай эндэ 5 талмайнууд баригдахаар хараалагдана, тэдэниие манай хүнүүд сэгнэхэ байха, - гэжэ Буряад Уласай Толгойлогшо тэмдэглээ.
