Кабанскын аймагай Клюевка тосхондо үни удаан хүеэгдэһэн һургуулиин нээлтэ сентябриин 1-дэ болобо. Шэнэ һургуули 100 һуури багтаана гэжэ Буряад Уласай засагай газар мэдээсэнэ.
Байшанай юрэнхы талмай болбол 3 мянга шахуу дүрбэлжэн метр, һургуули гурбан хэсэгһээ бүридэнэ, тэдэнэй хоёрынь хоёр дабхар, харин нэгэниинь нэгэ дабхар юм.
Засагай газарай хэблэл мэдээсэлэй албанай тэмдэглэһэнэй ёһоор, нэгэдэхи дабхарта бага ангиин һуралсалай танхимууд, 50 хүнэй һуужа эдеэлхэ хоолны газар, медкабинет, спортзал, лабораторинууд болон мастерскойнууд байна. Дээдэхи дахарта ахалагша ангиин һурагшад номоо үзэхэ.
Шэнэ һургуулида мүнөөнэй техникын шиидхэбэриинүүд хараалагданхай, тэрэ тоодо хизаарлалтатай хүнүүдта зорюулагдаһан – лифт болон тусхай хушалтатай шала бии.
Энэ барилга болбол «Болосорол» гэһэн гүрэнэй үндэһэн түсэлэй ёһоор баригдаа. Клюевкада һургуули барилга уласай засагай газарай тусхай харууһа доро хэгдээ, юундэб гэхэдэ, тэрэнэй барилгашад дээрэ дээрэһээ һэлгэгдэжэ, удаанай болоһон байгаа бшуу.
- Барилга удаашархадаа олон шалтагаантай байгаа: түсэлдэ заһалтанууд оруулагдаа, подрядчигууд һэлгэгдээ. Мүнөө дээрээ барилга дууһаха тээшээ болоо. Сентябриин 1-дэ һургуулиин хүдэлжэ байхын тула, хүүгэдэй шэнэ танхимууд соо һуража байхын тула бүхы арга шадалаараа болохобди. Энээниие өөрын хиналта доро абанаб, - гэжэ Буряад Уласай Толгойлогшо Алексей Цыденов урид хэлээ һэн бэлэй.
