Буряад Уласай Арадай Хуралай социальна политикын хорооной түрүүлэгшэ Игорь Марковецэй ударидалга доро зүблөөн үнгэрбэ. Хуулиин хэдэн проектнуудые зүблөөндэ хабаадагшад зүбшэһэн байна. Украинада тусхай операциин үедэ наһа бараһан сэрэгшэдэй үхибүүдые дэмжэхэ тухай хуули апрелиин 25-да үнгэрхэ сесси дээрэ Арадай һунгамалнууд хараха байна.
- Наһа бараһан сэрэгшэдэй үхибүүдтэ туһа үзүүлхэ, дэмжэхэ хэрэгтэй. Хүүгэдэй сэсэрлигтэ орохоһодонь, ээлжээгүйгөөр путевка үгэхэ, дунда ба дээдэ һургуулинуудта оруулха, лагерьта амархадань ээлжээгүйгөөр амаруулха арга боломжонууд харагдана, - гэжэ Игорь Марковец хэлэнэ.
Буряадай хүн зониие ниигэмэй талаар хамгаалгын яаманай мэдээсэһээр, тус дэмжэлгэ 6 жэлэй үнгэрхэдэ, тон ехээр хэрэгтэй болохо зэргэтэй. Арадай Хуралай һунгамалнууд энэ хуулиин проект заалһаа дэмжэхэ хэрэгтэй гээд хэлэнэ.
Эрэмдэг бэетэй зоной хүдэлдэг олониитын эмхи зургаануудай коммунальна хангалтын түлөө түлэдэг мүнгэнэй субсидиие ехэ болгохо тухай хуулиин үшөө нэгэ проект сесси дээрэ харагдаха.
- Урид 10 процент мүнгэниинь бусаагдадаг байгаа. Харин энэ хуулиин абтабал, 50 процент бүридүүлхэ зэргэтэй, - гэжэ Игорь Марковец хэлэнэ.
Эдэ болон бусад асуудалнууд апрелиин 25-да үнгэрхэ Арадай Хуралай ээлжээтэ сесси дээрэ зүбшэн хэлсэгдэхэ байна.
