Февралиин 17-до Буряад Уласай Толгойлогшо Алексей Цыденов Баргажанай аймаг айлшалһанай дүнгөөр хэдэн даабари үгөө. Аймагта тэрэ аймагта ажалаар түрүүн ошоһоной даабаринуудые дүүргэлтэдэ ороһон баригдаһан болон заһабарилагдаһан объектнүүдые ошожо хараа, тиихэдэ офлайн ба онлайн түхэлөөр Баргажанай аймагай ажаһуугшадтай уулзалгануудые үнгэргөө юм. Засагай газарта тэмдэглэһэнэй ёһоор, айлшалгын хүтэлбэридэ урид ороогүй һуурин газарнууд оруулагдаһан байгаа.
– Үнэн дээрээ шиидхэхэ асуудалнууд аймагта ехэ байна гэжэ тэмдэглэхэ хэрэгтэй. Эдэ асуудалнууд үсэгэлдэр үдэшэ ажаһуугшадатай уулзалгада бодхоогдоо. Тэдэ асуудалнуудай нэгэн – Хара Усун горхон дээгүүр хүүргэ барилга болоно. Арадай барилгын аргаар баригдаһан тэрэ модон хүүргэ хуушараа, тиимэһээ энэ жэлһээ проект зохёохо ажалнуудые эхилхэмнай, тэрэниие барилгада энэ жэлһээ хүтэлбэринүүдтэ оруулжа эхилхэ болонобди. Хүүргэ барилга нэгэ жэлээр бүтэшэдэггүй гэжэ ойлгосотой, зүгөөр энэ жэл хүүргээр ажал эхилбэ гээшэбди, – гэжэ Буряад Уласай Толгойлогшо тэмдэглээ.
Алексей Цыденовэй хэлэһэнэй ёһоор, энэ жэлһээ урид ажалаар ябалгын ажаһуугшадай үгэһэн даабаринуудаар томохон хэдэн объектнүүдые шэнэдхэлгэ эхилнэ. Тиин, Баргажанай Адаг һууринда 90 сая түхэригэй үнэ сэнтэй һургуулиин ехэ заһабарилга эхиеэ абаба. Тиихэдэ энэл тосхондо поликлиника заһабарилга хэгдэхэ. Баргажанай Адагай поликлиникын хүсэн шадал болбол нэгэ халаанда 150 хүниие үйлшэлгэдэ абаха зорюулалтатай, 5 ФАП-ууд эндэ баһа нэмэжэородог, тэндэнь 8,1 мянган хүн тоологдоно.
