«Буряад Уласай болбосорол тухай» гэhэн хуулида оруулагдаха заhабари нэмэлтэнүүдые Хуралай ээлжээтэ хуралдаан дээрэ хараха. Нэн түрүүн хороонуудай суглаан дээрэ тэдэниие хаража үзэhэн байна. «Холбоото уласай болбосорол тухай» гэhэн хуулида хизаарлагдаhан арга боломжотой эрэмдэг бэетэй hурагшадые хоёр дахин халуун эдеэгээр хангалга хараалагдана гэжэ Буряадай болбосоролой ба эрдэм ухаанай сайдай орлогшо Валерий Поздняков хэлэбэ. Мүнөө сагта, гэрhээ hуралгын үедэ, эдэ hурагшад эдеэнэй согсолбори абаха гү, али мүнгэн компенсацида хүртэхэ ёhотой.
Эдеэнэй согсолбори суглуулжа, тэрэниие гэр гэрээрнь тараалга нэмэлтэ мүнгэнэй гаргашалгатай болоно. Тиимэhээ, гэртэхиндэнь мүнгэн түлбэри түлэхэ гэжэ шиидхэбэри абатаhан байна. Мүнөөнэй байдалаар манай улас дотор хизаарлагдаhан арга боломжотой 1144 үхибүүд, тэдэнэй тоодо эрэмдэг бэетэй инвалид - үхибүүд hурана. Эдеэнэй үнынь мүнгөөр түлэлгэдэ 2021 ондо 28,8 миллион түхэригhөө дээшэ хэрэгтэй болохо.
Хуралай хороон энэ хуулиин түсэл нэгэ дуугаар дэмжэбэ.
- Энэ шиидхэбэри эрэмдэг бэетэй үхибүүдтэ ехэ шухала. Һунгамалнууд энэ асуудал нэгэтэ бэшэ бодхооhон байна. Уласай толгойлогшо Алексей Цыденовай дэмжэлгээр энэ асуудал шиидхэжэ шадаабди. Буряад Улас дотор халуун эдеэгээр гү, али тэрэнэй орондо мүнгэн түлбэреэр эхин ангиин hурагшад ба хүндэ байдалда байhан гэр бүлын 1-дэхи -11-дэхи ангиин hурагшад хангагдана. Гурбан жэлэй хугасаа соо hурагшадые халуун эдеэгээр хангалгада мүнгэнэй hомололго гурба дахин дээшэлээ. Нёдондо жэлдэ hурагшадые халуун эдеэгээр хангалгада 450 миллион түхэриг нэгэдэлгын бюджедhээ hомологдоо, - гэжэ хорооной түрүүлэгшэ Игорь Марковец хөөрэжэ үгэбэ.
