Буряад Уласай Арадай Хуралай түрүүлэгшэ Владимир Павлов февралиин 20-да үргэрһэн ээлжээтэ дүрбэдэхи хуралдаанай дүнгүүдые дуулгаа. Тэрэнэй һанамжаар, нилээд удха шанартай хуралдаан болоо. Саг болзор соогоо депутадууд багтаа үгышье хадаа, табигдаһан бүхы асуудалнуудые хаража үрдеэ.
Юрэнхыдөө зүбшэн хэлсэлгэдэ 52 асуудал табигдаһан байгаа гээд һануулая. Гадна үшөө нэгэ асуудал «засагай газарай сагай» оршондо зүбшэгдөө. Хуралдаанай хугасаа соо һунгамалнууд 32 хуули абаа, тэдэнэй табаниинь нэгэдэхи уншалгаар, мүн 20 тогтоол абтаба. Гол асуудалнуудай тоодо 2019 оной болон 2020, 2021 онуудай түсэб болзортохи улас түрын мүнгэн һан тухай хуулида заһалтануудай түсэл оролсоно гээд спикер тэмдэглэбэ. Уласай мүнгэн һан 2018 оной декабрь һарада баталагдаа бэлэй. Гэбэшье, олон тоото заһалтануудые оруулха хэрэг гараһан байгаа. Хамагай удаа тус дансын ëһоор, олзо оршын хубида 62,6 миллиард түхэриг хараалагдаба. Энэ хадаа анхан байгшаһаа 8,3 миллиард түхэригөөр нэмэгдэбэ гээшэ. Тэдэнэй 6 миллиардниинь гүрэн түрын һанһаа дамжуулагдаха зэргэтэй. Хамта дээрээ, 35,6 миллиард түхэриг олзын хубида түсэблэгдэнхэй. Гаргашануудайшье хуби 65 миллиардаар дээшэлүүлэгдээ. Тиигэжэ уласай һангай дефицит 2,4 миллиард түхэриг бүридүүлбэ.
«Хараа баримта – 2035» гэһэн ехэ данса зохëон баталха хэрэг нилээд хэсүү байба, гээд Павлов тэмдэглээ. Тэрэ аяар бүхэли жэлһээ үлүү сагта зохëогдожо байгаа, гээд һануулая. Энэ хугасаа соо олониитын уулзалга хуралдаанууд үнгэргэгдээ, Буряад уласай толгойлогшын дэргэдэхи тусхай үүргэтэй бүлэг мэргэжэлтэдэй үзэмжэдэшье табигдаа. Тэрэ хараа түсэб Арадай Хуралай бүхы хороонуудта зүбшэлгэ гараа. Гэхын хажуугаар, данса зохëогшод элдэб хэмжээнэй албан зургаануудай зүбшөөл абаха ëһотой һэн.
Хуралдаанай дүнгүүдые согсолхо үедөө тушаалнуудта томилогдоошодые спикер мүн лэ онсолоо. Жэшээнь, олзын хэрэг эрхилэгшэдэй эрхэнүүдые хамгаалха талаар болоод Арадай Хуралда Оросой үсөөн тоото үндэһэ яһатануудай бүрин эрхэтэ түлөөлэгшэ гээд бүрин эрхэтэ хоëр тушаалтад хуралдаанай үедэ томилогдоһон байна.
«Бизнесэй талаар омбудсмениие Буряад Уласай толгойлогшо хуулиин ëһоор зуршалаа һэн. Тэрэ тушаалда Чингис Матхеевай таараха, үгынь алиш талаһаа шэнжэлэгдэһэн байна. Һүүлэй һүүлдэ тэрэниие томилхо гээшые парламент зүбшөөгөө. Олзо эрхилэгшэдэй эрхэнүүдые хамгаалжа байха уялгаяа тэрэ аша үрэтэйгээр дүүргэжэ байха бэзэ гээд найданабди, - гээд Павлов хэлээ һэн. – Үсөөн тоото үндэһэ яһатанай түлөөлэгшэ гэжэ Лариса Мурзакина нэрлэгдэбэ. Энэл хуралдаан дээрээ тэрээндэ үнэмшэлгэнь барюулагдаа».
