Июниин 20-до энэ хөөрэлдөөн болоһон байна. Нëдондоной май һарада үнгэрһэн хуралдаан дээрэ гүрэнэй болоод муниципалитедэй мэдэлэй газарнуудые түлбэригүйгөөр хэрэглэхыень гү, али арендада наймаасалдангүйгөөр үгэхэ тухай гурим баталагдаа һэн гээд һануулая. Энэ шиидхэбэри газарнуудые ашаглалгада эдэбхитэйгээр хабаадуулха хүсэлһөө һабагшатай. Тэрээн зуур, газарай талмайн бага-ехын хэмжээн тодорхойлогдоо бэлэй, тус тустаа 3 болон 20 гектар тэрэнь бүридүүлнэ.
Арадай Хуралай Газарай асуудалнуудай, хүдөө ажахын түрын болон эдэй дэлгүүрэй талаар хорооной түрүүлэгшын орлогшо Баир Гармаев тэмдэглэһээр, тус хуули ëһо нилээд арсалдаатайгаар абтаа һэн. Гол түлэб газарай талмай тухай асуудал тоосоо гаргаа. Жэшээнь, Яруунын аймагта сүлөө газар ехэ, тэндэ 50-100-шье гектар таһалжа үгэхөөр байгаа, гээд парламентын хэблэлэй албан дуулгана.
Зүблэлдөө бэлдэхэ үедөө Хорооной депутадууд Кабанскын болон Тарбагатайн аймагуудта суглаануудые үнгэргэһэн байгаа. Тэндэ таһалагдаха газарнуудай хэмжээ ехэ болгохо тухай дурадхалнууд дахин дахин ороо бэлэй, бултандаш бэшэ һаа, газараа эдлэхэ, отогжуулха аргатай 5 жэлһээ доошо бэшэ хугасаа соо бэеэ мэдүүлһэн фермер ажахынуудта ааб даа. Арадай Хуралай Түрүүлэгшэ Цырен-Даши Доржиев «энэ асуудалые бодожо үзэхэ хэрэгтэй» гээд тэмдэглэбэ. Гадна, эрхэтэд зондоо тус хуули тухай ойлгуулжа мэдээсэхэ ажалаа эршэдхэхэ шухала гээд тэрэ уряалаа.
