Арадай Хуралай сентябрь һарада үнгэрхэ ээлжээтэ хуралдаан дээрэ «Захиргаанай хуули хазагайруулга тухай» хуулида хубилалтануудые оруулха тухай хуулиин түсэл зүбшэгдэхэ. Хото һуурингуудай болбосон түхэлэй байдал эбдэһэнэй түлөө яла тохолгые гуримшуулха тухай дурадхалые Арадай Хуралай Эдэй засагай, байгаалиие нөөсэнүүдые ашаглалгын болон оршон тойронхиие хамгаалгын хороон оруулһан байгаа. Тэрэ түсэлынь хоëрдохи уншалгаар харагдаха: нэгэдэхи уншалгада тэрэ дабадахи зарлалай 30-дахи хуралдаан дээрэ баталагдан абтаа һэн. Энэ асуудалаар элидхэгшэ үшөө элирээдүй байна, гээд Восток-Телеинформ дуулгана.
Түсэл зохëогшодой һанамжаар, болбосон түхэлэй дүримүүдые хазагайруулха ушарнууд олошорно, зүгөөр захиргаанай харюусалганууд энэ ушараар хараалагдаагүй зандаа. Жэшээнь, Улаан-Үдын дэбисхэр дээрэ хүдэлжэ байһан болбосон түхэлэй байдалай дүримэй 11-дэхи хэһэгтэ ургамал ногоогоор шэмэглэхэ тухай эрилтэ хараалаатайшье һаа, зүгөөр энээнэй бодото дээрэнь бэелүүлэгдээгүй һаа ямар хорилто хэһээлтэ хараалагдаагүй үлэнхэй. Эгээл тиимэ байдал усадхахын тулада түсэл дотор элдэб янзын харюусалганууд тодорхойлогдохо жэшээтэй, юрэ абабал, дэмы ургаһан бургааһа, ногоо саг соонь сабшаагүйдэ захиргаанай тусхай харюусалга тохогдохо болоно.
Тэрээн зуур, хото тосхонгуудай болбосон байдал бузарааһан болоогүй элдэб бэшэг зурагуудые гэр байрые ханада, хорëо харшада, харгын далан дээгүүр гэхэ мэтэ газарнуудта хайша хэрэг эреэлһэнэй түлөө «дохëо мэдүүлгэ» мэтын захиргаанай хэһээлтэнүүдые хараалха шухала гээд түсэл дотор хэлэгдэнэ. Бусадшье дутуу дундануудые усадхаха талаар харюусалганууд бии. Гэхэшэлэн, юрын эрхэтэдтэ гурбанһаа таба мянган түхэригэй, тушаалтадта – табанһаа арба мянган түхэриг, эмхи зургаануудта – табинһаа зуу мянга түхэригэй яла хараалагдаха болохо.
Үшөө нэгэ шухала хүсэнэг гэрэй амитадтай холбоотой. Мүнөө сагта нохойнуудай хүндэ аһаха ушарнууд олошороо. Нохойгоо хорижо абаагүй ушарай түрүүшынхиеэ тохëолдобол, 500 түхэригэй яла мүнөө хараалагданхай. Теэд энэ хэмжээн хүниие балай дайранагүй шахуу. Тиигэжэ, иимэ ушараар ялын хэмжээ эрид дээшэлүүлхэ гэһэн дурадхал оруулагдана: юрын эрхэтэдтэ хоëрһоо таба мянга, эмхи зургаануудта табанһаа арба мянган түхэриг хүрэтэр яла тохогдодог болохо жэшээтэй.
