Москвада гүрэн түрын засагай газарай ноябриин 23-да үнгэрһэн суглаан дээрэ Байгал шадарай нютаг можонуудые хүгжөөхэдөө Алас Дурна оршонхи нютагуудта тааруулагдаһан арга нүхэсэлнүүдые, олон тоото хүнгэлэлтэнүүдые хэрэглэхэ боломжонууд зүбшэгдэбэ. Ородой Холбооной Засагай Газарай түрүүлэгшэ Дмитрий Медведев эдэ мэтын асуудалнуудые һайса шэнжэлээд таатай зохид дурадхалнуудые оруулха даабари үгэһэн байна, гээд Кремлиин сайтда хараһанаа Восток-Телеинформ дуулгана.
Засаг-газарай суглаанай дүнгүүд тушаа Засаг-газарай түрүүлэгшын орлогшо Юрий Трутнев мэдээсэхэдээ, Байгал шадарай нютагуудые Улас Дурнынхида адлирхуугаар дэмжэхэ ажал эхилэнхэй гээд тэмдэглээ. Гүрэн түрын тусхай зорилгото заршам-программын, мүн Алас Дурна хүгжөөлгын тусхай жасын хараа шэглэлһээ уламжалан мүнгөөр хангагдаха зарим түсэлнүүд шэлэгдээ.
Байгал шадарай нютагуудта дүүрэн хүсэнэй туһа олгуулхын тулада, нэгэдэхеэр, Алас Дурна хүгжөөлгын жасые мүнгөөр хүсэд хангаха шухала. Тэрэ жаса мүнөө дээрээ арайл шадалгүйдэнэ, гээд Трутнев онсолхо юм.
Байгал шадархи нютагуудай губернаторнуудай зүгһөө Байгал шадархиие хүгжөөлгын заршам тоглолтые мүнгөөр хангабал таатай һэн гэхэ мэтын дурадхалнууд соностоо.
