Буряад Уласай Арадай Хуралай Ниигэмэй бодолгын талаар хорооной гэшүүд Игорь Марковецэй хүтэлбэри доро “Ивалгын аймаг” гэһэн муниципальна байгууламжада ажалай нүүдэл суглаа үнгэргөө. Сэдэбүүдэй нэгэниинь болбол хүүгэдэй хүнгэлэлтэтэй халуун хоол хэр хангагданаб гэжэ болоо юм.
2021-2022 һуралсалай жэлдэ аймагай һургуулинуудта халуун хоолоор хангагдаһан бага ангиин һурагшадай юрэнхы тоо 4,7 мянган хүн тоологдоно. 5-11 дугаар ангинуудта хүнгэлэлтэтэй халуун хоолоор хангагдадаг хүүгэдэй тоо 2,4 мянган хүн болоно.
- Мүнөө гүрэн 1-һээ 4-дэхи анги болотор, хүндэ хэсүү байдалда ороһон, ОВЗ хүүгэдтэ халуун хоолдо миллиард түхэриг шэглүүлээ. Харамсалтайнь гэхэдэ, һургуули бүхэндэ эдеэ хоол шанаха газарнууд үгы байна бшуу. Жэшээнь, Һужаагай СОШ-то 900 хүүгэд һурана, харин буфедынь 64 хүндэ зорюулалтатай. Оросой Холбоото Уласай Засагай газарай хэмжээндэ хоол шанаха газарнуудые бариха болон һэльбэн шэнэлхэ талаар тустаа хүтэлбэри хэрэгтэй байһан тухай асуудал хаража үзэхэнь шухала байна. Манай хүүгэд ажамидаралай тон үндэр хэмжээ хаража үзэжэ байха ёһотой. Хүүгэднай аятай зохид газарта һураха, амидарха ёһотой. “Ухаалиг һургуули” гэһэн һургуулида хооллолгын сахим системэ хэр зэргэ хүдэлнэб гэжэ Поселиин һургуулиин һурагша бидэндэ харуулжа үгөө, - гэжэ Игорь Марковец тэмдэглээ.
