Зэдэ аймагай Алцаг һууринда үертэ хохидогшодто туһа хүргэгдэхэ. Энээн тухай уласай толгойлогшо Алексей Цыденов июлиин 31-дэ аймагта айлшалжа ошоходоо энээн тухай хэлээ. Ажаһуугшадта сабшалан газар үгтэхэ ба үбһэ абахадань унаа тээбэреэр хамһаха болоно.
Аадар бороо орожо, мүн баһа уулаһаа ехэ уһан ерэжэ, Алцак һууринай хото хорёо уһанда абтаа, харгы угаагдаа һэн. 43 хотон хохидоо. Огородой ногоон болон сабшалан мүндэртэ сохюулаа, дал хорёо уһанда ороо. Нютагайхинай хэлэһэнэй ёһоор, сабшалан ехэ хохидолдо ороо гэжэ уласай засагай газарай хэблэл мэдээсэлэй албан дуулгана.
Буряад Уласай толгойлогшо хохидолдо ороһон соёлой байшан ошожо хараа. Заһабарилгада мүнгэ һомолхо тухай шиидхэбэри абтаа.
Зэдэ аймагай һуурин газарта ехэ уһан ерээ гэжэ Восток-Телеинформ дуулгаа һэн гэжэ һануулая. Үерэй уһан Алцаг һууринаар урдажа, дал хорёо хотон һандаагаа. Тиихэдэ аймагта мүндэр ороо, зарим нютагуудаар зайн гал унтараа. Алцагһаа гадна Армаг болон Дээдэ Тарида ехэ мүндэр ороо һэн. Заһабарилгын ажалнууд бороогой болиходо эхилхэ гэжэ дуулгагдаа һэн.
