Буряад Уласта Арадай Хуралай һунгалтын һара үдэрые гаргаа. Һунгамалнуудай долоодохи шэнэ зарлалые ажаһуугшад 2023 оной сентябриин 10-да һунгаха. Парламентын даргын тэмдэглэһэнэй ёһоор, Хуралай зургаадахи зарлалай бүридэл мүнөө ажалаа дууһажа байна гэжэ Восток-Телеинформбэшэнэ.
- Мүнөөдэр ээлжээтэ бэшэ богонихон сесси үнгэрөө, эндэ бидэ 7 дугаар зарлалай һунгамалнуудай һунгалтын ажалда эхи үгөөбди. “Үнэн шударга Орос улас – Үнэнэй түлөө” гэһэн нам һунгалтада оролсохо болоно, тиигэжэ бидэ Хуралай 7 дугаар зарлалда орохо һанаатайбди. Мүнөө манай намһаа кандидадууд бүрилдүүлэгдэнэ, һунгагдажа, 5 жэл соо хүдэлһэн мүрөөрөө арад зонтойгоо ажаллахабди, - гэжэ Газарай харилсаанай, хүдөө ажахын бодолгын болон хэрэглэгшэдэй заха зээлиин талаар Арадай Хуралай хорооной түрүүлэгшын орлогшо Сергей Пашинский хэлээ.
Нүгөө бэшэ намууд болохоёо байһан һунгалтада баһал бэлдэжэ эхилээ. “Энэ зарлал ажалаа дууһаба гээшэ ааб даа. ЛДПР болохоёо байһан һунгалтада бэлэн. Кандидадуудай нэрэ тоолбори бэлэн болонхой, би Москва ошожо, бултыень зүбшэн хэлсээб, манай хүтэлбэри бэлэн, намай түрүүлэгшэ Леонид Слуцкий хүтэлбэриеэ тунхаглаа. Тиимэһээ бидэ бэлэн байнабди, - гэжэ Сергей Дорош хэлээ.
Июниин 23-25-да өөһэдын бага хуралда кандидадуудай нэрэ тоолборитой танилсуулха болонобди. Тиихэдээ Сергей Дорош һунгалтые гурбан үдэрэй туршада бэшэ, харин нэгэ үдэрөөр үнгэргэхыень Избиркомдо хандажа, тэрэшэлэн алмагдаһан мүнгыень СВО-до сэрэгшэдтэ эльгээхыень уряалаа. “Мүнөө “тансаглаха” саг бэшэ, бидэниие, ерэдүйдэ манай эрхэ сүлөө хамгаалжа байһан манай нютагайхидта туһалха хэрэгтэй”, - гэжэ тэрэ хэлээ.
Хуралай дарга Владимир Павлов шэнэ зарлалда нэрээ дэбжүүлхэ байһан тухайгаа зарлаа.
