Зулгы зунай хаһын урда тээ Арадай Хуралай һунгамалнууд Байгал шадарай аймагта айлшалжа, “Горячинск” курортын шэнэлэгдэжэ байһан ажалтай танилсаа. Аяншалгын болон амаралтын асуудалнуудыехарюусажа байдаг Эдэй засагай бодолгын, байгаалиин баялиг ашаглалгын болон экологиин талаар хороон иимэ үүсхэл гаргажа тиишэ хүрэжэ ошоһон байха юм.
Тус хороооной түрүүлэгшын орлогшо Егор Олзоевой хэлэһэнэй ёһоор, Буряад Уласай парламентда ехэ хуралдаан зохёон байгуулагдахаар бэлдэгдэжэ байнхай, тэндэ уласай курортын ажал хүгжөөхэ асуудал хаража үзэгдэхэ. “Горячинск” болбол Буряад Уласай мэдээжэ курортнуудай нэгэн болоно, тэрэнэй түүхэ зуун жэлһээ үлүүтэй юм. Зүгөөр курортын эд хэрэгсэлэй-техникын ехэнхи баазань зүблэлтэ сагта байгуулагдаһан гэхэдэ болохо. Курортын шэнэ хүтэлбэрилэгшэд шэнэдхэлгын болон хүгжэлтын ажалнуудые нилээдгүй ябуулаад байна. Тиимэ хубилалтануудые өөһэдын нюдөөр хараһан һунгамалнууд тэрэниие ехэтэ һайшаагаа.
Албанай хэрэгээр ошоһоной хэмжээн соо тэндэ суглаан болоо, курортын түлөөлэгшэд амарагшадта кэшбэк хараалха тухай, байшангуудта дулаа үгэлгын тариф тухай болон бусад асуудалнуудые бодхоогоо. Парламентаринуудай тэмдэглэһэнэй ёһоор, эндэ хэлэгдэһэн шиидхэгдээгүй асуудалнууд Арадай Хуралда бэлдэгдэжэ байһан хуралдаан дээрэ зүбшэн хэлсэгдэхэ.
