Газарай асуудалнуудай, хүдөө ажахын болон хэрэглэгшэдэй заха зээлиин талаар Арадай Хуралай хорооной түрүүлэгшэ Дмитрий Швецов хүдөө ажахыда анхарал хандуулха гол шэглэлнүүдые тайлбарилжа үгөө. Бюджедэй түлэбые олоной үмэнэ шагнаха үедэ тэрэ дэмжэхэ арга хэмжээнүүдэй бюджедэй гол мүрнүүдые хэлэжэ үгөө.
Тэрэнэй тэмдэглэһэнэй ёһоор, 2023 ондо “АПК болон хүдөө һуурин газарнуудай хүгжэлтэ” гэһэн гүрэнэй хүтэлбэри һомололгодо 1,517 млрд түхэриг хараалагдаха, энэнь энэ жэлтэй сасуулхада, 67 сая түхэригөөр ехэ болоно. Хүдөө ажахын үйлэдбэрилэгшэдые гүрэнэй талаһаа дэмжэлгэдэ бүхыдөө 960 сая тухай түхэриг, тэрэнэй 425-ниинь уласай бюджедэй мүнгэн шэглүүлэгдэхээр хараалагдана.
Гэхэтэй хамта, жэл соо үрэһэнэй, үтэгжүүлгын, ГСМ-эй, сэлбэгэй болон бусадай үнэ сэн яһала үнтэй болоо гэжэ ойлгохо хэрэгтэй. Байгша оной сентябрь һарада дизель түлишын үнэ сэнгэй индекс нёдондо жэлэйхиһээ 109,3 % хүрөө. Энэ юун гэһэн үгэ бэ гэхэдэ, мүнгэнэй үнэ сэнгээ аладха тума, энэ һалбарида бюджедэй гаргашанууд үнэн дээрээ доошолхо болоно, тэрэнь гүрэнэй хүтэлбэринүүдэй индикаторнуудые дүүргэлгэдэ болон хүдөө ажахынхидэй сангай-эдэй засагай дэмжэлгэдэ муугаар нүлөөлжэ магадгүй бшуу, - гэжэ Швецов тоолоно.
