Ээлжээтэ сессидэ 52 асуудал шиидхэхэ зорилготойгоор оруулагдаа. Арадай Хуралай Түрүүлэгшэ Владимир Павловай дурадхалаар, гүрэнэй элитэ ехэ ажаябуулагша Владимир Жириновские шэмээгүй зогсолтоор хүндэлэн ёһолбо. Владимир Жириновский мэндэ ябаа һаа апрелиин 25-да 76 наһанайнгаа дабаан дээрэ гараха һэн. Гүрэнэй дүүмын суута һунгамал ябаһан Владимир Жириновский нэгэтэ бэшэ Улаан-Үдэ ерэһэн, ажаһуугшадтай уулзажа хөөрэлдэһэн байха.
Хуралдаанай үедэ һунгамалнууд, сэрэгэй албанда ябаһан хүбүүдэй гэр бүлэ дэмжэхэ тухай хуулиин түсэл шиидхэхэ. Хуулиин ёһоор сэрэгшэдэй үхибүүд ээлжээндэ байнгүйгөөр хүүгэдэй сэсэрлигтэ абтаха ёһотой юм. Сэрэгшэдэй гэртэхинэй өөһэдөө шэлэһэн хүүгэдэй сэсэрлиг, һургуули тэдэнэй хүүгэдые абажа хүмүүжүүлхэ, һургаха ёһотой болохо.
Тэрэнэй хажуугаар Арадай Хуралай хорооной түрүүлэгшэ һунгаха тухай асуудал анхарагдаха. Тус хорооной түрүүлэгшын уялгануудые саг зуура һунгамал Сергей Дорош дүүргэнэ.
